| Read In Nepali

नेवाः देय् दबूया न्याक्वःगु तःमुंज्यापाखें पितब्यूगु धनकुटा घोषणापत्र

   नेपाल देसया सकल नेवाःतय् मंकाःगु संगठन नेवाः देय् दबूया धनकुटा नगरय् थ्वहे ११२९ चौलागाः १० व ११ निन्हु यंक जुगू ऐतिहासिक न्याक्वःगु तःमुंज्याय् ब्वतिकयापिं जिपिं देय्या थीथी जिल्लाया नेवाः खलः, पुचःया प्रतिनिधिपिंन्सं संघीय लोकतान्त्रिक गणतन्त्र नेपाः नीस्वनगु आन्दोलनय् गुकथं नेवाःत न्हृयलुवाः भूमिका म्हितावयाच्वंगु खःत उकथं हे थ्वयात थातं तयेगु व अझ प्रगतिशिल, अग्रगमनकारी व जनपक्षीय स्वरुप बियायंकेगु राष्ट्रिय अभियानय् म्हिगः थें न्हृयचिलाः आजुइ थ्यंकेत उलिहे प्रतिवद्ध दु धैगु क्वाःतुगु भावना प्वंकाच्वना । नापं थ्वहे भावनाया लिध्वासा क्वबियाः नेपाःया छगू आदिवासी नेवाःतय् मंकाः तातुना कथं राज्यपुनसंरचनाया झोलय् नेवाः स्वायत्त राज्य नीस्वना थःगु आदिभूमि नेपाल मण्डल लागादुने अग्राधिकार व आत्मनिर्ण्र्ााा अधिकार सहितया राज्यया फुक्क तंगि व थासय् नेतृत्वयायेगु व नीति निर्माणयायेगु अधिकार सुनिश्चितयायेगु अभियान पूवंकेगु निंतिं माःगु इलय् माःकथंया सकतां पलाः ल्हवनेत नेवाः देय् दबूया नेतृत्वय् सकल नेवाःतय्त छप्पं छधी यानाः वनेमाः धैगुलि नं थ्व तःमुंज्यां दुग्यंक वाःचायेकूगु जुल ।

अथेहे नेवाः स्वायत्तताया अधिकार ल्हाःतय् लाकावं त्वःतेगु कुतलय् नेवाःत व देय्या मेमेगु आदिवासी समुदाययापिं नापं जानाः वनेमाः व उकिया निंतिं गैरनेवाः आदिवासी जनजातिपिन्सं उमि थःथःगु स्वायत्त राज्य अधिकारया पक्षय् न्हृयाकीगु अनान्दोलनयात नं नेवाःतय्सं थःगुहे आन्दोलन कथं नालाः उमिगु पंलीगु धैगु नं थःगु महत्वपर्ूण्ा दायीत्व खः धकाः तायेकावायच्वंगु खत ।

आः थ्व इलय् संविधानसभायापाखें न्हूगु संविधान दयेकाः नेपाःयात संघीय राज्य कथं न्हूधाः यायेत्यंबले नेवाःतय् मंकाः भावनायात ध्वाथुइकाः ऐतिहासिक नेपाल मण्डल लागादुने स्वशासनया अधिकार दुगु नेवाः स्वायत्त राज्य धस्वाकेगु ब्यवस्था जुइमाः, अथेहे नेपाःया थीथी लागाय् च्वंपिं नेवाःतय् निंतिं नं फुक्क थासय् समानुपातिक प्रतिनिधित्व व उप-स्वायत्तताया अधिकार सुनिश्चित जुइमाः, यदि न्हूगु संविधानयापाखें थथे नेवाःतय् अधिकार सुनिश्चित यायेगु ज्या मजुल धाःसा उज्वःगु संविधानत नेवाः समुदाययापाखें गुगु हे कथं नाला कायेमफइगु व उकिया विरुद्ध सकल नेवाःतय्पाखें ग्यानापूगु पलाः ल्हवनेगु जुइ धैगु खँ नं थ्वहे इलय् राज्यसत्ता व संविधान सभाया प्रतिनिधिपिगु ध्यान सालाकायेगु ज्या थ्व घोषणापत्रपाखें यानागु जुल ।

११२९ चिल्लागाः १२
धनकुटा ।